UCAS Clearing全攻略
- HKSA admin
- 7月30日
- 讀畢需時 5 分鐘
隨着 A-level 成績公佈日臨近，你自然會擔心自己嘅成績是否足以達到大學有條件錄取要求。雖然未能達到所需成績並非理想結果，但絕對唔代表世界末日，UCAS Clearing 仍然可以俾你一個重新出發嘅機會。
咩係 UCAS Clearing？
大部分英國大學喺學生確認咗自己 Firm（首選）或者 Insurance（備選）學位之前，其實都未必會填滿晒所有學位名額。UCAS Clearing 就係一個程序，俾啲未能達到原本有條件錄取要求嘅學生，有機會申請入讀仍有空缺學位嘅課程。你可以將呢個程序想像成香港小學或者中學「叩門」入學嗰種機制。
大學通常會喺 UCAS 官網同大學自己嘅網站上公布仍有學位空缺嘅課程清單，讓學生透過 Clearing 再次申請。對於報咗 24/25 學年入學嘅學生，Clearing 會喺今年 7 月 5 日至 10 月 20 日開放。由 7 月 5 日起，UCAS 申請人就可以開始查閱 Clearing 嘅課程資料。不過，學生要等到成績放榜之後先可以正式申請——IBDP 學生係 7 月 6 日，SAQ 學生係 8 月 5 日，而 A-level 學生就係 8 月 14 日。
要留意，唔係所有大學都有提供 Clearing 名額。例如牛津（Oxford）同劍橋（Cambridge）等，以及其他一啲排名較高嘅大學，通常都唔會參與 Clearing。另外，一啲競爭激烈嘅課程，例如醫科、牙科、獸醫等等，一般喺正常申請階段已經超額錄取，仲有等候名單，所以基本上唔會喺 Clearing 放出學位名額。
點解要參加 Clearing？
最直接嘅原因係：你未能達到原先有條件錄取嘅成績要求，而 Clearing 就俾你一個第二次機會。不過，亦有可能你由申請大學開始，對其他科目或者其他大學產生咗興趣，發覺原本揀嘅唔一定最適合自己。又或者你而家反而鍾意另一間大學，而唔係之前揀咗嗰間。有啲人可能考得比預期好，攞到更高分，咁佢哋就可能想試吓申請一啲排名更高嘅大學，或者係要求更高嘅課程，而呢啲課程喺 Clearing 都有提供。
Clearing 亦都係一個好好嘅機會，等你重新考慮之前申請、被錄取但後來放棄咗嘅大學。你可能因為經濟因素、課程設計，或者單純係鍾意其他學校多啲，而想改變選擇。你可以睇返我哋之前寫關於點樣揀大學嘅文章，了解更多資訊。
邊啲人可以申請 UCAS Clearing？
以下幾類學生都可以透過 UCAS Clearing 申請入讀大學課程：
未能達到原先有條件錄取要求嘅學生
喺最初申請時無收到任何 offer，或者無接受任何 offer 嘅學生
喺 6 月 30 日之後先遞交申請嘅學生
主動放棄原先 firm choice，選擇進入 Clearing 嘅學生
喺 2023 年，總共有 67,990 位學生透過 Clearing 成功入讀大學，其中：
32% 屬於主動放棄 firm choice、自己釋放入 Clearing 嘅學生
30% 屬於未能達到 offer 成績要求嘅學生
其餘學生則係原本無 firm choice 或者一開始無申請大學嘅人
從呢啲數據可以睇到，Clearing 絕對唔係一件「差」嘅事，反而係一次好好嘅機會，俾學生重新審視自己真正想讀嘅科目同大學，再作出選擇。
Clearing 流程
同 UCAS 一開始遞交申請唔同，Clearing 唔係直接網上申請，而係需要你 主動打電話畀大學，查詢你有興趣嘅課程仲有冇名額，以及佢哋會唔會願意收你。你要諗定想申請邊啲課程，然後盡快行動，因為好多排名較高嘅大學或者熱門課程，好快就會滿額。當你獲得正面回應後，就可以去 UCAS Hub 輸入有關資料，正式申請並確認學位。雖然 UCAS 系統上每個學生喺 Clearing 階段技術上只可以輸入一個申請，但你可以不斷打電話畀唔同嘅大學，直到搵到願意收你嘅為止。
你亦都可以用 UCAS 提供嘅 Clearing Matches 工具。呢個工具會根據你原本申請資料、學科空缺、Clearing 入學要求同歷年數據，自動為你配對最多 50 個潛在選項。你可以喺呢 50 個課程入面揀自己有興趣嘅，按「Interested（有興趣）」掣。跟住，嗰啲大學如果對你有興趣，就可能會主動聯絡你，問問題或者安排面試。
之後你會有機會解釋自己嘅情況，查詢你想報讀嘅課程有冇名額，以及你係咪符合資格申請。部分情況下，大學可能當場就俾你答覆。不過亦有可能佢哋會即場進行一個簡單面試，或者安排一個正式面試。面試可以好簡單，只係問幾條問題了解你是否適合該課程；但亦可能會比較詳細，視乎你申請嘅課程競爭程度同學科特性。
點樣準備打 Clearing 電話？
當你發現自己唔符合大學 offer 嘅成績要求時，好自然會驚慌失措，急住打電話搵 Clearing。但喺你打電話之前，一定要先登入 UCAS Hub 檢查清楚，睇下你嘅 Firm 同／或 Insurance offer 有冇變成「Unconditional（無條件取錄）」。好多時候，即使你只係差少少未達標，大學都有可能仍然會收你。
打電話前要準備好以下資料：
UCAS ID 號碼
Clearing 號碼（喺 UCAS Hub 可以搵到）
你嘅成績 或 UCAS Tariff Points（學分點數）
除此之外，你亦應該準備好解釋點解你想報讀嗰間大學同嗰個課程，包括你嘅興趣、學術背景、課外活動或者其他成就等。預先做定 research 係好重要嘅，顯示你係有心申請而唔係亂槍打鳥。
搵一個安靜、有良好訊號嘅地方打電話，唔好揀學校禮堂或者人多嘅地方。如果有車喺附近，其實車入面係一個唔錯嘅選擇，夠安靜又唔會比人打擾。
總結
Clearing 呢個過程本身可能令人好緊張，甚至一開始聽到要走 Clearing 呢條路，都會覺得有啲失望。但只要你有做好準備，加上用一個開放、正面嘅心態去面對呢個「第二次機會」，你好有可能會發現，最後去咗一間其實更適合你自己嘅大學。
References
Foulds, Eleanor. “Guide to UCAS Clearing 2025.” Whatuni.com. Whatuni, July 7, 2014. https://www.whatuni.com/advice/clearing/university-clearing-complete-guide/41459/.
Manchester Metropolitan University. “Frequently Asked Questions about Clearing.” Manchester Metropolitan University, March 27, 2025. https://www.mmu.ac.uk/clearing/frequently-asked-questions#ai-57086-2.
Mosse, Tamsin. “Preparing for Your University Clearing Call.” Thecompleteuniversityguide.co.uk. Complete University Guide, June 24, 2021. https://www.thecompleteuniversityguide.co.uk/student-advice/final-choice/preparing-for-your-university-clearing-call.
UCAS. “Highest Number Ever of Students Accepted through Clearing.” UCAS, September 21, 2023. https://www.ucas.com/corporate/news-and-key-documents/news/highest-number-ever-students-accepted-through-clearing.
留言